BULANDSHAHR, UTTAR PRADESH: Senior police officer, Prashant Kumar news agency ANI ke koishe Uttar Pradesh police para Rs. 70 lakh donate kurishe. Etu toh murija Inspector Subodh Kumar Singh laga family ke dishe. Inspector Subodh Kumar Singh toh December 3 te mob violence te murai dishe. UP government para agay te compensation hesab te family ke Rs. 50 Lakh bhi de kena thakishe. Police koishe ami khan nijor laga will para Rs. 70 Lakh aro donate kurishe.
Inspector ke December 3 mob violence laga hamla para murishe. Tai khan etu bosti te mob para jhamela bana toh rukhabole kosis te Inspector aro tai laga team toh etu ghatna huwa bosti te jai kena thakishe. Etu protests toh right wing group Bajrang Dal para suru kurishe aro tai khan para protests te rasta khan bhi bon kurishe.
Etu protests te Inspector toh bishi jokom hoishe. Jokom huwa nimite Diver para tai ke gari te buhai kena loi jai thakishe. Hoile bhi protests kora khan para gari rukhai kena inspector ke guli mari kena morai dishe. Post mortem khobor hesab te Inspector toh tai laga baya eyebrow niche te guli laga para murishe.
Inspector ke asol para mura manu Yogesh Raj ke etu saal January laga olop samay agote dhurishe. Yogesh Raj toh right-wing group Bajrang Dal laga district leader ase. Group para hoile bhi Yogesh toh innocent ase koishe.
Inspector Subodh Kumar Singh ke murai diya ek moina bhitor te dusra police official Head Constable Suresh Vats ke Ghazipur te mob para murai dishe. Etu toh December 30 te Prime Minister Narendra Modi para district rally te kotha kura pichete hoishe. Etu ghatna te hamla kora manu khan toh Nishad Party laga members ase koishe.
Yogi Adityanath toh etu ghatna khan toh biya political plan ase koishe.
Add Comment