June 3, 2021: Tripura Cabinet para COVID-19 bemar manuh nemite state laga private hospitals te elaj kora charges toh fixed kori thishe. Etu fesla toh Tripura Cabinet para private hospitals te COVID-19 bemar manuh aro tai khan laga ghor manuh logot poisa besi charge nakoribo nemite order ekta te janai thishe. Tripura Cabinet meeting te Central Government Health Scheme (CGHS) para poisa fixed korikena thaka neshina COVID-19 bemar manuh logot State laga ILS Hospital aro Tripura Medical College (TMC) Hospital te poisa besi charge nahoboli fesla korishe. Etu poisa charge kora te tests, oxygen-supported beds aro tawai samil ase koishe. Hoilebi, konuba test neshina CT scan aro tawai toh samil nai koishe. “hotai samai ase ke, private hospitals para bemar manuh logot poisa besi loi ase, etu nemite State Cabinet para private hospitals te COVID-19 bemar manuh oper te poisa besi naloboli fesla korishe,” koikena high level official para Northeast Now logot janaishe. Central Government Health Scheme (CGHS) hesab te ek din pithor samai hospitals para Rs 4,000 oper toh oxygen nemite charge naloboli lage, ordinary ICU beds nemite e din te Rs 7,500 aro 1 din te ventilator-supported ICU beds nemite Rs 9,000 oper charge naloboli lage koikena janaishe. Tripura te itya dak tuita(2) private hospitals — Tripura Medical College Hospital (TMCH) aro ILS ase, etu tuita(2) hospital toh be West Tripura district te ase aro COVID-19 positive bemari logot elaj kori ase koishe. Khobor para janaishe ke, etu tuita(2) hospital te sob melaikena 98 jun elaj kori ase, ILS te 51 bemar manuh ase aro TMC te 47 bemar manuh admitted korikena ase koishe.
Add Comment