Aizawl, October 31 : Mizoram laga Chief Minister Zoramthanga para koisey ki rajya ke etya cholai thaka party Mizo National Front (MNF) tu Mizoram te aro ekbar power te ahibo. Aro tai para pura confidence para koisey ki MNF para rajya te nijor laga takat para government form kuribo.
Mizoram CM Zoramthanga para Tuesday (October 31) te koisey, “ Amikhan ke sarkar banabole nimitey 21 seat lagey. Ami para akha kora hisap te, amikhan tu komsikom 25 nohoile etu para bisi seat bi pabo parey.”
Tai tu Mizoram te hobole thaka assembly election te MNF laga ki bhabna asey aro etu election picheyte alliance(dusra party logotey gatbandhan) kuribo na nai etu sawal laga jawab di thakisey.
CM Zoramthanga para etu bi wapas yaad dilaisey ki Mizoram te Mizo National Front (MNF0 aro BJP para chola NDA laga majotey rishta thaka tu “issue based”(mamla hisap te) asey.
Tai para enaka koisey, “ Amikhan (MNF) para ekta kisim laga nyom kanoon cholai kuntu toh BJP para chola NDA laga nyom kanoon logotey nimilibo parey. Judi BJP para chola NDA laga nyom tu Mizo manu khan laga against te asey koiley amikhan tu eu laga khilaf te jabo.”
Poila te bi Mizoram laga CM para BJP para chola NDA sarkar ke taikhan laga nyom khan nimitey condemn kurisiley.
Add Comment