GUWAHATI | February 25: Congress pora Sunday te Assam laga daru hatsa te Prime Minister Narendra Modi chup thakiya ke sawal korise aro tai khan laga president Rahul Gandhi pora state laga BJP government khan ke bodnam korise ki tai pora ekko hisab nakoriya nimite ase koikena.
“Assam Government pora ekko hisab nakoriya aro kam thik nakoriya nimite zeheri daru pora 140 pora besi manu morise aro besi manu khan etu hatsa logpaikena hospitals khan te ase,” Gandhi pora Sunday din te tweet korise.
State government officials pora 124 morise koise aro 331 jun manu hospitals te treatment kori ase koise.
Olop thakikena press conference te, Congress spokesperson Pawan Khera pora Modi ke target korikena koise ki tai hotai samoy politics nimite kotha koriya pora samoy napai hoilebi etu zeheri daru pora moriya manu khan nimite ekta kothabi ola nai.
“Politics kotha pora jolaibole pare hoilebi kotha pora government jolaibole naparibo,” tai pora koise.
BJP-ruled Arunachal Pradesh te government pora choita jaati ke permanent resident certificates dibo laga fesla pora ola chamela bi loikena tai pora Modi ke target korise.
Modi ke sitha bodnam korikena, Khera pora koise, “Tai bhujur pora saam tak berai thakiye, teen-jar bar kabra podli korikena. Hoilebi kam nimite tai ke juniya toh nakuriye aro (BJP) chief ministers khan bi kam nakoriye. Etu nisina hatsa te kile apuni eman chup ase?”
Khali elections jitiya toh tai laga maksat ase hoilebi kam koriya toh ekko nai, tai pora koise aro Assam laga hatsa pora loikena kenika daru bikiri koriya manu khan logote khilaf action loi ase, etu jaanibole koise.
Arunachal Pradesh te deputy chief minister laga ghor ke hamla korise aro shanti wapas anibole ki koribole laage, etu Modi pora jawab koribole laage, Khera pora koise.
Etu mamla hisabte, Congress spokesperson pora Pulwama hamla laga kotha bi loise aro koise ki hatsa toh hoi hoilebi etu hatsa bicchete ki kadam loi, etu pora government laga himat toh jaaniye.
“Manu khan laga kotha hunikena aalchi laagise aro hatsa laga bicchete tai laga government pora ki kadam loi ase, etu manu khan pora jaanibole mon ase,” tai pora koise.
Add Comment