AIZAWL, February 25: Mizoram capital Aizawl pora 20km pora besi doori Muallungthu laga ekta bosti te ghor bona jakka te tweita matha laga harti powa pora Archaeological Survey of India (ASI) aro Birbal Sahni Institute of Palaeo-botany (BSIP) laga experts khan ke asurit khelaise.
Etu harti khan toh laash laga harti, dekshi bithor te halikena maati bithor te haliya laga neum thakise.
Centre laga department of science and technology laga nijete pora Lucknow-based autonomous institute toh etu tweita harti ke study koribole ASI logote mili kena kam koribole ase.
Etu matha laga harti tweita toh jowa habta ghor bona jakka te excavator machine kam koriya samoy te paise.
Etu tweita institute laga experts khan pora koise ki etu harti powa toh BC samoy laga hobole pare nahoile toh megalithic samoy laga bi hobole pare.
Niraj Rai, ekta BSIP scientist aro archaeogenetics of ancient DNA laga experts pora koise, “Etu harti khan toh DNA testing aro carbon dating koribole laage. Moi khan etu nimite kam koribo. Hoilebi moi khan etiya tak date najane. Etu toh sixth century laga hobole pare kile koile megalithic samoy te dekshi pora rubai diya toh besi common thakise. Etu koi ki megalithic samoy toh 400 AD te khotom hoise koikena. Etu harti khan toh 10 feet maati laga nijete paise. Etu geherai laga maati toh purana ase. Maati nijor rubai diya pora etu harti rubai diya laga samoy toh kindi koribole paribo. Etu laga mamla te, maati toh 10 feet rubai kena thakise, etu pora samoy toh 600 BC tak bi hobo pare.”
Pura duniya te enika rubai diya toh besi julai thakise. Dekshi pora rubai diya toh Egypt, India, Japan, Cambodia aro Syria laga ekdu purana neum te julai thakise.
Sujeet Nayan, ASI, Aizawl circle laga deputy superintending archaeologist pora koise, “Etu powa besi dangor ase hoilebi etiya enika ase koikena manibole toh besi joldi ase. Rai, kono Mizoram te April laga pohoila habta te ahibole ase logot moi kotha korise. Moi khan etu harti khan laga scanning aro DNA testing koribole laga phabana ase. Aro etu pora besi study koribo nimite moi khan New Delhi laga ASI director general milai kena authorities concerned laga iccha mangibole laagibo. Hoilebi, etu notun powa pora state laga history(kahani) te notun kadam milaise.”
Add Comment