DCCI Toh Hoiley, Indefinite Shutter Down Kuriboley  Asey,  April 26th Tey Para

April 23, 2024 : Dimapur tey business kuria manu khan ke, Nagaland laga political group khan para bhabana bhi kuriboley napara laga tarika khan chulai kena extortion kuri thaka nimitey, Dimapur Chamber of Commerce aru Industry (DCCI) para April 26^th Friday tey para shuru kuri kena indefinite shutter down kuri boley asey koi asey, dukan aru business khan sob toh bon kuriboley raazi kuri loishey, DCCI para statement tey koishey ki, NPGs khan toh eman durr jai shey ki, tai khan laga nijor MRP sticker machine khan dukan khan keloi jai kena, itu piche tey youtubers khan nahoiley kunba reporter khan ke matikena, tai khan para khushi khushi mrp print lagai di kena, utu dukan ke badnaam kuriboley matey koishey, dukan malik khan misamishi laga daam magey koi kena. DCCI para koishey ki, itu youtuber khan aru channel khan toh hoiley eku najani kena thakey osol tey toh ki hoi asey koi kena, aru social media khan tey upload kuri thakey koishey, aru ekta alag tarika Chula toh hoiley, dukan malik khan tai khan laga dukan tey illegal saman khan rakhi asey koi kena, itu dukan malik khan ke matikena poisa bishi fine magi thakey koishey, itu NPGs khan para itu letra kaam nakuria agetey tai khan toh CCTV khan aru DVR khan toh sob bon kuridiye koishey. Juwa hapta tey bhi NPGs khan toh hoiley business kuria man uke poisa mangi kena kidnap (dhuri kena uthai loi jaboley) kushish kurishey koishey, itu manu ke toh bishi biya para marikena asey aru itya toh tai hospitalize hoi kena asey koishey. DCCI para koishey, business kuria manu khan toh hudai eneka harassment pai asey, NPGs khan laga camp khan tey nahoi lebi office khan tey mati thakey koishey, Dimapur tey business kuriboley bishi dukpawa nimitey businessman khan toh osor Assam phaney jaboley kuria sey, aru kun ba toh jai jai asey koishey. DCCI para koishey ki, itu indefinite shutter down toh hoiley eneka he jai thakibo eku solution nula tak, tai khan para Law enforcement agency khan kearu police khan ke request kurishey juldi para itu matter opor tey saboley karney.