Donald Trump laga COVID-19 vaccine besas nai: Kamala Harris

September 7, 2020.Sunday din te Democratic party’s vice-presidential candidate Kamala Harris para koishe ke, President Donald Trump laga COVID-19 vaccine logot besas nai, judi hosa laga khobor bhal ase napa dak besas nakoribo. Ami laga hesab te, manuh sob nemite tangor issue ase. Ami koiase ke, moi Donald Trump logot besas nakori. Etu nemite efficacy aro reliability khobor napa dak besas nai” koikena Harris para CNN logot koishe. Indian-American Harris toh 55 umer ase aro tai toh California para Senator ase. Tai toh first kala African American aro India para jaa maiki ase aro tai toh United States laga tangor political party hoikena vice president nemite junikena ase. Trump para jolti korikena COVID-19 nemite vaccine aro therapeutic olaishe, aro dosura tangor desh neshina Russia, China aro India para be kam koriase. Trump koishe ke, October moina te toh vaccine toh olai jabo aro national plan te kam korikena tangor scale te vaccine thiboli soruh koribo.  Hoilebi, Harris para koishe ke, tai Dr Anthony Fauci ke besas koribo, keli koile etu kam te expert ase. “ami public health experts khan para ke kotha kobo etu honikena manibo”. Joe Biden aro ami ekta plan ase, ari etu national plan ase. Trump logot eku plan nai”, koikena Harris para koishe. US presidential election toh November 3 darik te thakiboli ase aro etu samay, Democratic party’s presidential candidate aro former vice president Joe Biden aro Harris para Donald Trump aro Republican Party Mike Pence logot tai jun para election toh keliboli ase koishe. United States te Coronavirus bemar para 191,000 American manuh morikena ase aro 6. 3 million neshina manuh bemar hoikena ase koishe.