Imphal, April 14 : Election Commission of India para April 19 aro April 26 te 18th Manipur Parliamentary constituency laga election hobole 48 ghonta ageyte loudspeaker khan cholabole mana kuridisey.
Manipur laga duita parliamentary constituency te 1ojun candidate including 5jun independent candidate election nimitey larayi kuribole asey.
Ekta official notification para koisey ki juwa 48 ghonta te kuntu tu 17 April 2024 para election khotom hobole tak asey etu homoitey April 19 te Inner Manipur Lok Sabha seat te election free aro fair para hobole dibole nimitey loudspeaker chola tu strict para mana kurikina asey.
Taikhan para etu bi warn kurisey ki kanoon laga hisap te eku order bhangaisey koile jurmana terabo lagibo.
Election hobole 48 ghonta ageyte, kuntu ke silence period nohoilebi pre-election silence period koi, etu homoitey sob campaign logotey jurikina thaka nohoilebi election logotey jurikina thaka kaam ke rokhaikina rakhibo lagey aro kun bi, including desh laga manu, journalist, politician khan election logotey jurikina thaka eku kaam te hisa lobole allowed nai.
Etu tu voter khan ke campaign khan para influence hoikina ekta peaceful break dibole nimitey kora laga asey. Taki taikhan para vote dhala homoitey bhabikina faisla lobole paribo.
Representation of the People Act, 1951(RP Act) laga Section 126, 126A aro 135C under te, sob election logotey jurikina thaka kaam khan, kuntu tu public meeting rakha, bhasan diya nisna election laga result khan ke influence nohoilebi affect korey etu khan silence period te kuribole mana asey.
Etu kanoon tu Election Commission of India (ECI) laga notification laga through para enforce kurisey.
Manipur laga plain district te etya tak gari khan te fit kurikina road show aro election campaign kora dikhanai.
Add Comment