Mumbai, March 17 : Ed Sheeran, kun March 12 te India te pungchisey tai para Saturday rati te South Mumbai laga Mahalaxmi Race Course ground te dui ghonta adha tak gana khusi pa manu khan laga manoranjan kurisey aro 30 para bisi gana kurisey.
Etu Grammy winner para koisey ki tai tu India te wapas ahibole khusi thakisey. Tai tu India ke first 2015 te visit kurisiley aro etu picheyte 2017 te ekta concert te perform kurisiley.
Ed Sheeran para fan khan ke tai tu aha saal wapas ahibo koikina kosom khaikina koisey, “Ami janey India tu ekta dangor jaga asey, hoilebi concert te aha sob manu bi Mumbai para nohoi. Manu khan para tatey thakibole nimitey bisi lamba travel kurisey. Manu khan train, plane te uthisey, gari cholaisey aro baccha khan ke bi loikina ahisey. Ami para etu ke halka para luwanai, ami tu manu khan para yatey ahibole nimitey effort diya tu khusi pai asey. Apni laga Saturday rati diya nimitey dhanyabad, apni khan para eku bi kuribole pari thakisey hoilebi apni para etu homoi tu amilogotey bitai asey.”
Tai para koisey, “Etu tu ekta suruwat hey asey.”
Guitar marikina, Ed Sheeran para “Tides”, “The A Team”, “Perfect”, “Happier”, “Don’t Call Me Baby”, “Castle On The Hill”, “Galway Girl” aro Eyes Closed” gana kurisey. Etu concert laga ekta highlight ki thakisey koiley, Ed Sheeran tu popular Punjabi track “Lover” te Diljit Dosanjh logotey jam kuri thakisey
Add Comment