ADDIS ABABA, ETHIOPIA: Ekdum khatarnak Ethiopian Airlines crash howa laga karan jaach koribo nimite besi samoy lagibo, etu hatsa te 157 jun manu morise aro duniya bhar te brand-new Boeing aircraft model toh uribole pora rukhai dise, ekjun Ethiopian government minister pora Saturday te koise.
Flight ET 302 laga crash toh 10 March te Nairobi te jabole maati pora urikena olop minutes bicchete hoise, aro tate buhiken athakiya manu khan sob morise, etu nimite duniya bhar te Boeing 737 MAX 8 aircraft model ke uribole diya nai.
Witnesses khan pora koise ki etu plane toh naak aage korikena Ethiopian capital Addis Ababa laga southeast te ekdum khali khedi te kirise, etu pora plane toh pura mehin kori dise aro maati laga bithor te dukara khan paise. Etu hatsa log powa manu khan toh 35 desh laga manu khan thakise.
Dagmawit pora koise ki pajiya bostu khan sob bisaribole choi mohoina lagibo aro ghor manu khan ke bi DNA samples toh Addis Ababa te nahoile bahar desh khan te Ethiopian Airlines offices te dibo karne janai diye ase.
Death certificates toh twei habta bithir te dibo, tai pora koise.
Hatsa log powa manu laga ekjun ghor manu toh laash pabo ke rukhibo karne kowa ke khusa powa koise.
Etu manu pora koise ki moriya manu laga Jewish dharam laga hisab te, klaash wapas na ahiya tak funeral funeral lobole naparibo, aro choi mohoina rukhiya toh tai laga ghor manu khan nimite besi diktari diye ase.
Etu Ethiopian Airlines Flight 302 crash howa laga hatsa toh 737 MAX 8 nimite tweibar wala khatarnak hatsa ase, pohoila wala toh October te ekta Indonesian Lion Air jet crash howa pora sob 189 passengers aro crew morise.
Etu Boeing 737 MAX 8 toh brand-new jet ase. Olop mohoina bithor te etu tweita crash howa, aro karan bi ekki nisina miliya pora duniya bhar te desh khan aro airlines khan pora etu plane toh uribole pora maana korise.
Lion Air hatsa laga pohoila report toh crash howa ek mohoina bicchete olaise.
Etu Ethiopian plane laga awaz aro flight data recorders toh Paris te ase, tate French, Ethiopian aro American investigators pora ki galdi hoise, etuke jaach koribole ase.
Dagmawit pora koise ki France ke flight recorders ke jaach koribole junise, kile koile etu desh toh Ethiopia logote osor thakiya nimite.
Add Comment