NEW DELHI: Tweita New Zealand mosques te Friday te banduk mariya te 50 jun moriya majote panchjun Indians manu morise, Indian High Commission pora Sunday te tweet korise.
New Zealand police pora aji confirm korise ki ekdam biya shooting laga hatsa te manu moriya toh 50 te othise aro asol suspect, ke Australia-born Brenton Tarrant ase koikena jini paise, toh etu hamla te ekjun haadiya manu thakise koise.
Hamla koriya manu pora Friday te pratna koriya samoy te bahar desh pora ahiya khan ke hamla korise aro etu sob live stream korise.
Etu hamla te moriya Indians khan laga khobor logote, high commission pora khobor korise ki New Zealand immigration pora hamla te moriya manu laga ghor manu khan ke Visa dibo nimite ekta kisim laga webpage khulikena ase koise.
Etu ‘India in New Zealand’ Twitter account pora bi hotai samoy modot dibo nimite helpline numbers dise.
Etu Indian High Commission pora Saturday te tweet korise ki tweijun persons of Indian origin (PIO) logote milaikena 9 Indians kot te ase etu janibo karne local authorities khan logote kotha korise ase aro tai khan ghor manu khan logote khobor bi diye ase.
Konoba ghonta thakikena, Kerala Chief Minister Pinarayi Vijayan pora confirm korise ki Kerala pora ekjun 25-saal umar maiki, Ancy Ali, bi Christchurch adangki hamla te moriya majote ekjun thakise.
Farhaj Ahsan, etu hamla te moriya ekjun Indian-Origin manu, laga ghor manu khan pora bi etu khobor toh news agency IANS ke confirm korise ki tai hamla te morise koikena.
Phat etu hamla bicchete, Prime Minister Narendra Modi pora New Zealand PM Jacinda Ardern ke eki logote khara ase koikena janaikena lekhise aro koise ki kheen aro hinsa nimite bhal aro democratic societies te jakka nai.
Add Comment