October 31, 2023: Monday din deh Israel laka Prime Minister Benjamin Netanyahu para Gaza deh ceasefire tho nahubo kui shae. Alak kotha deh UN para aid kan uto Gaza deh patai ase humanitarian needs karne, etu supply tho napunchi bo kui shae.
Hamas para October 7 deh Israel keh hamla kuri shae aro etu laka jawab deh Israeli ground forces kan Gaza Strip deh kili ase aro air strikes kan para Hamas-run Palestinian territory deh hamla kuri shae.
Etu katarnak military operations tho 2.4 million manu kuto Gaza deh ase, taikan keh bui kilai de ase. Hamas-controlled health ministry para tho 8,300 laka upor manu kan keh murai di shae kui shae.
Foreign press lokot kotha kura time deh, Netanyahu para ceasefire kura tho Hamas keh surrender kura nishi nha heh hubo kui shae. Sose nutun Israeli report laka isap deh gunmen kan para 1,400 manu murai di shae aro 230 manu keh hostage uthai di shae.
“Ceasefire manga tho Israel keh Hamas lokot surrender kuri b kwa manga ase, terrorism keh surrender kuri b manga ase… Etu tho nahubo,” tai para kui shae. Tai para aro war tho najita tak kili taki bo kui shae.
Israel laka ally, United States para b ceasefire keh object kuri shae. “Itia ceasefire kura tho thik nai kui nah biswas kuri ase mukan,” National Security Council spokesman Jogn Kirby para kui shae. Tai para aro etu deh focus nakuri nah aid kan Gaza deh ponchi bole focus kuri bole lakeh kui shae.
Add Comment