Jaipur, October 27 : Rajasthan laga Chief Minister Ashok Gehlot para Friday din te rajya laga manu khan nimitey 5ta guarantee announce kurisey kuntu te, Old Pension Scheme nimitey kanoon aro cowdung (guru paikhana) ke kg te Rs 2 para kina bi shamil thakisey. Election nimitey alag kosom khan kha majotey government college laga student khan ke laptop diya aro natural disaster(jaiseki earthquake, flood khan) aha homoitey loss huwa tu cover kuribole nimitey Rs 15 lakh laga insurance cover bi thakisey.
Gehlot para koisey ki tailaga sarkar para 1 crore maiki khan ke smartphone bi dibo aro etu logotey 3 saal nimitey internet service bi dibo.
Tai logotey kosom pura kora laga track record asey koikina janaikina etu Rajasthan Chief Minister para koisey ki senior Congress leader Rahul Gandhi para kisan khan laga loan maaf kuridibole laga kosom kha tu thik homoitey te pura kurisey.
Tai para Jaipur te press ke kotha kuri thaka homoitey enaka koisey, “Rahul Gandhi aro Mallikarjun Kharge para kosom kha tu pura kuribo lagey koikina koi. Juwa bar, Rahul Gandhi para kisan khan laga loan 7din bhitor te maaf kuridibole kosom khaisey aro etu kosom tu thik homoitey pura kurisey.”
Enforcement Directorate (ED) para state Congress chief Govind Singh Dotasra logotey link thaka jaga khan ke raid kurikina ek din huwa picheyte, Gehlot para BJP para chola central government ke federal probe agency laga galat istamal kora laga iljam lagaikina hamla kurisey.
Add Comment