New Delhi, October 31 : Opposition(BJP laga against te thaka rajneetik party laga) MP khan para taikhan “sarkar para modod kora attacker” khan para taikhan laga iPhone para jankari chor kuribole kosis kuri asey koikina warning paisey koikina kuwa picheyte Central Government para etu mamla te investigation kuribole laga order disey.
Minister of Telecommunications and Information Technology, Ashwini Vaishnaw para koisey, “Bharat laga Government para desh laga sob manu khan laga privacy aro security ke raksha kora laga role tu bisi serious para loi aro taikhan para etu information khan laga gehrayi tak pungchibole nimitey investigation kuribo. Enaka jankari pa picheyte aro pura jag ate etu laga kotha feilija picheyte, amikhan para Apple ke bi sarkar para sponsor kora laga attack laga iljam laga te hosa hosi laga, aro thik thak information dikina etu investigation te join kuribole koisey.”
Tai para koisey ki media report khan laga hisap te, kunba MP khan para notification pa te taikhan laga phone te ‘Sarkar para sponsor kora atatck’ laga jankari paisey, hoilebi etu mamla te Apple para aha bisi bhak jankari tu misa misi aro specific nathaka nisna dikhi asey.”
Tai para koisey, “Apple para koi asey ki etu jankari khan tu incomplete nohoilebi imperfect information khan laga basis te hobo parey. Taikhan para enaka bi koisey ki Apple para kunba khatra thaka laga notification diya tu misa misi laga alarm bi hobo parey nohoile kunba detect kuribole napara laga attack hobo parey.”
Tai para agey barikina koisey, “Apple para etu bi dawa kurisey ki Apple ID khan tu phone khan te suraksit para encrypt kurikina asey aro etu nimitey phone chola manu laga permission nathakikina etu ID khan cholaikina phone te gusibole nohoilebi etu ID khan ke janibole ekdam mushkil asey.
Apple para bar bar taikhan laga bustu tu privacy karney design kurisey koikina koi thaka nimitey Minister of State for Electronics and IT Rajeev Chandrasekhar para X (Twitter) te dhala ekta post te hudisey ki juudi Apple laga phone khan suraksit asey koiley kiley 150 opor desh laga manu khan ke enaka khatra laga notification pathai.
Add Comment