Lengnyu,10 April 2025: Noklak district under te thaka Lengnyu village laga Government Primary School, juntu 1963 te establish kuri se, etiya 10th April 2025 te officially upgrade hoi jabo Government Middle School (GMS) te.
MLA aru DPDB Chairman Noklak, Benei M. Lamthiu address te koise ki government logot bhal relationship maintain kura to region development nimite important ase. Middle School upgrade hobo karone, enika hope ase ki students enrollment bhi baribo. MLA Lamthiu teachers khan ke bhi acknowledge kurise ki, juntu sob challenges thaka bhi nijor duty faithfully perform kuri ase. Tai Advisor of Education Dr. Kekhrielhoulie Yhome aru Chief Minister Dr. Neiphiu Rio ke bhi thanks janai dise, school upgrade kuridiya nimite. Program suru te Lamthiu para monolith bhi unveil kurise.
Noklak laga Deputy Commissioner, Arikumba koise ki education to ekta sobse important saman ase, aru government aru community logot co-ordination rakhibo lagi ase school bhal para cholabo nimite. Tai vocational training aru skill development programs school te introduce kuribole appeal kurise, juntu students khan ke practical knowledge dibo. DC para Parents-Teacher Interaction bhi regularly kuribole suggest kurise, juntu para students laga overall development bujhibo pare. Tai ekta message te koise ki, government property ke nijor laga property nisena care kuribole lagi ase.
EAC Panso, Bangjunglemba students khan ke discipline, respect aru competition maintain kuribole encourage kurise. Tai School Management Board laga leadership ke praise kuri se, parents aru community logot bishi milik kena kaam kuribole urge kurise. Education quality improve kuribo aru government school te enrollment utha opor emphasis dise. Tai koise ki, etu achievement to ekta start ase future growth aru opportunity karone— school aru village nimite.
Sub-Divisional Education Officer Noklak, Hekuto Sema community involvement upor stress dise, school development karone. Government para GPS ke GMS upgrade kura support dise, kintu long-term progress community laga active participation opor depend kure. Tai community ke encourage kurise ki creative initiative lobi school ke aur bhal banabo nimite.
KSU President, Shangchiu tai short speech te koise ki Lengnyu to education field te ekta pioneer ase. School upgrade hobo karone appreciation di ase, kintu teacher shortage bhi ekta dangor issue ase, etu acknowledge kurise. Tai parents, church aru village leaders khan ke request kurise ki, school ke strong banabo responsibility sob lobo lage—khali teachers aru students nahoi kena. Lengnyu laga unity ke bhi appreciate kuri she, tai sobke inspire kurise ki etu milestone ke ekta starting point banai kena future te aro dangor achievement loble.
Program to Chonglio T aru Mongtham P para chair kurise, invocation pronounce kurise S. Langshe, Chairman of Lengnyu Village Council. Special song Pushia aru friends para present kurise, vote of thanks dise Pungom T, SMC Chairman, aru benediction dise Mongthsoa T, Youth Pastor, LBC.
Add Comment