Guwahati, October 24 : Tuesday (October 24) te, Assam laga Guwahati seher te, police para Hengrabari electric(charge kurikina chola) rickshaw laga connection te ekjun suspect ke arrest kurisey.
Etu arrest huwa manu laga naam tu Tileswar thakisey aro tai nijor bi ekta electric rickshaw driver thakisey.
Reports hisap te, etu mujrim para poila te ekjun electric rickshaw driver ke ekta chutu mutu larayi huwa picheyte chaku marikina moraidisey.
Murija rickshaw driver laga naam Khagen Das thakisey.
Tatey laga local manu khan para dawa kurisey ki larayi tu ekjun maiki aro Tileswar laga majotey hoisiley hoilebi larayi chuli thaka homoitey Khagen Das tu bich te gusisey.
Hoilebi, Khagen Das para enaka bich te gusa picheyte Tileswar para aro Khagen logotey bi larayi kurisey.
Etu homoitey gusa uthikina, Tileswar para osor laga ekta dukan para chaku anikina Khagen Das ke etu chaku para hamla kurisey.
Khagen Das nimitey medical help pungchibole agey te tai tu murijaisey.
Etu ghotna tu Hengerabari LP School osor te hoisey.
Local manu aro Khagen laga parivar para complaint kora hisap te, police para mujrim ke utu area para arrest kurisey.
Police laga ekta source para koisey ki etya etu mamla te investigation chuli asey aro Tileswar tu police laga custody te asey.
Add Comment