Meghalaya : Jaintia National Council para railway project laga khilaf te thaka tu aro ekbar janaisey

Guwahati, October 23 : Jaintia National Council (JNC) para Meghalaya laga East Jaintia Hills district te railway project laga prastav rakha nohoilebi propose kora laga against te thaka tu aro ekbar janaisey. Aro etu nimitey dusra jaga para manu ahikina tatey bohha, prakriti ke biya kuridiya aro tatey laga local manu khan nimitey eku faida nathaka laga karon janaisey.

Ekta press release te, JNC laga president Sambormi Lyngdoh para railway project laga khilaf te  etu council laga main objection(monjur nathaka laga karon) janaisey:

JNC para bhoi khai asey ki etu railway project para East Jaintia Hills district te dusra jaga laga bisi manu ke gusibole dibo, enaka kurikina taikhan laga norom demographic balance ke olta polta kuridibo aro Jaintia manu khan laga alag etihasik pehchna ke khatra te dhalidibo.

Etu council para biswas kuri asey ki railway line bana para etu district laga busti area, jungle, pahari area aro nudi khan te khatarnak asar anidibo kuntu khan tu tatey laga local manu khan pra kha luwa nimitey kamayi kuribole aro taikhan laga cultural practice nimitey jaruri asey.

Etu group para behes kurikina koi asey ki etu railway project para main faida tuetu district laga factory aro industry khan pabo. Aro efale local beypari aro truck driver khan laga competition barijabo aro kunba muskil laga samna bi kuribo parey.

Etu council para sarkar ke railway project te dhyan nidikina etu district para lagiya development ke pura kuribole te dhyan dibole request kurisey. Jaiseki rasta laga condition bhal kuridiya, sarkari school aro hospital khan ke upgrade kora aro government college ban ate dhyan dibole kosiey.

Jaintia National Council (JNC) para Meghalaya Democratic Alliance (MDA) sarkar te thaka Jiantia MLA khan ke cabinet te etu mamla te kotha kuribole aro East Jaintia Hills District te asli development lagiya te dhyan dibole koisey.

Etu council para Meghalaya laga sarkar ke enaka warning bi disey ki judi railway project ke nacharisey nohoilebi hatai nidisey  koiley taikhan tu ki action hoilebi lobole tayar asey.