Aizawl, October 23 : Mizoram laga district administration khan para rajya laga youth khan ke November 7 te hobole thaka Assembly election te active para bhag lobole dibole karney hosla barabole ‘Young Voters Festivals’ organise kuri asey.
Election officials para Monday din te koisey ki Mizoram laga sob 11 district te, local authorities khan para enaka tyohar tu organization khan logotey milikina enaka festival tu dui nohoile 3 din karney rakhibole asey.
Ekjun election official para koisey ki etu tyohar chuli thaka homoitey, bisi alag alag activity aro contest khan jaiseki extempore speech, quiz, declamation contest, reels bana contest, selfie contest, hashtag campaign, signature campaign, flyer bana contest, jag ate essay likha contest, jag ate slogan likha laga contest aro jag ate painting kora laga competition rakhibo.
Etu official laga hisap te, Election Commission laga irada tu 18 years opor thaka Mizoram laga manu khan ke taikhan laga vote diya laga haak tu cholabole nimitey encourage kuribole laga asey.
Etu opor te, tai para koisey ki Election Commission para bura buri khan nimitey aro khas dhyan rakhibole lagia manu khan ke vote dibole paribole nimitey special subidha dibo.
Election official khan para sob manu, khas kurikina nutun voters khan ke etu tyohar enjoy kuribole, vote kuribole aro taikhan laga sathi aro parivar khan ke bi enaka kuribole karney encourage kuribole request kurisey.
Mizoram laga 8,51,895 eligible voter khan laga majotey, 50,611 voters tu jawan manu(18-19 years laga) asey, 8,490 voters khan tu bura buri (80 years opor khan) asey aro 3,243 voters tu gao thik thak nathaka manu khan asey.
Add Comment