Headlines

Hornbill laga Day 4Rev. Fred Nile pora 4th day Hornbill Festival suru korise

December 4, 2018
73 Views

Kohima, 04 December: Tuesday din Naga Heritage Village, Kisama jaga deh Rev. Fred Nile, ED Member of Legislative Council, Australia pora 4th day Hornbill festival suru korise. Etu time deh Deputy Speaker, Zhaleo Rio aro Advisor V&AH, Women Resource Department, R. Khing toh host thakishe. Hornbill Festival 2018  deh, 4th din laga culture show toh Zeliang khan pora cultural dance (Rehoi Lim) korikena suru howah thakishe. Etu bechide Kuki group khan pora bamboo dance (Sutha Lam) kora thakishe. Yimchunger tribe laga Lunso Beru Cultural Club khan pora folk song (Kheangberü Khün) kora thakishe. Etu gana toh January second hapta Tsüngkamnio festival lowah time deh gai. Sumi cultural group khan pora indigenous game (Babu Shiha Salam Salam) kora thakishe. Etu toh India deh British khan pora rule kora time deh Yemishe village pora ola (originated) laga ase. Etu toh besi phak bosti community khan pora British officials logode welcome aro honour kora time deh kori. Sangtam cultural khan pora folk song aro dance Hooto Hooto kora thakishe. Etu toh Mungmung festival time deh khali moda group khan pora hee kori. Rengma cultural khan pora Ngada dance kora thakishe. Naga festival toh November moina kothom howah time deh manai. Dimasa Kachari cultural group khan pora folk dance (Kharamjang Bai Hadubani) kora thakishe. Tusara tribe khan pora cultural show kora khan toh, Pochury (Athso Theserie),  Angami (Pitho Tsali), Phom (Shangi Apai Hommu Yubu Nyih), Lotha (Khio Lak Tsuhang), Konyak (Lamphoon Moarao Man Thoa Haap), Garo (Ro’ongDea), Chang (Sukem Chia), Chakesang (migration skit), aro Ao (head hunter’s dance) thakise. Cultural Show laga evening session deh Chief Guest toh Secretary, Tourism Department, Government of Telangana B. Venkatesham, IAS logode host Secretary, Tourism Department T. Mhabemo Yanthan thakishe.         

Kisama deh ‘MYKI” saman

 

 

Naga Heritage Village, Kisama jaga deh jai thaga Hornbill Festival laga part hesab deh, Women Resource Department pora ekta department booth bonai kena ase. Tati  “MYKI” saman toh bekhabo karni dekhai kena ase.  Booth deh Women Resource Department pora plan korikena aro support korikena, Self Help Groups khan pora bona alag-alag saman khan dekhai kena ase. Carry bags ke charikena Mekhelas, Neck Warmer, Caps, Wrapping Papers, Baskets, Handbags, aro SHGs pora bona alag-alag bhaat saman khan ase. Etu event toh Hornbill festival kothom nahowah tak eki logode jai thakibole ase.

Kisama deh Nagaland Coffee

 

 

Kisama deh Nagaland Coffee toh Kajukho Arucho, Vivito Yeptho aro South Africa laga Dr. Peter Vermeulen pora jolai ase. Etu toh Department of Land Resources pora otha (promote) laga ase. Kisama jaga deh, Hornbill Festival thaga time deh Nagaland Coffee bona laga main aim toh pahar duniya deh Nagaland coffee othabole laga ase. Othabole laga ke charikena, etu bona toh  moda bacha bacha aro maike bacha khan ke responsible laga bhabona toh ahhibo karni bona laga ase.  Booth deh coffee deya toh Wokha, Zunheboto, Mon aro Mokokchung districts jaga pora anna laga ase. Aji kali Nagaland Coffee toh South Africa laga desh, Dubai aro Bahrain jaga deh export kori.  Alag-alag coffee- Espresso, Cappuccino, Latte, Americano, Flat White aro Scotch Espresso nesana khan be paijabo.