New Delhi, 4 July : Luciidforyou naam pora porichito Geni Kamki India’s Got Latent Season 2 te sob attention paisey
India’s Got Latent Season 2 laga second episode te bishi interesting contestants ase, kintu sob laga attention toh participant Geni Kamki te ase, kun Luciidforyou naam te Instagram te porichito ase. Geni show te ₹1 lakh cash prize jitibo paranai, kintu social media te tai laga popularity dekhaikena Samay Raina ke surprise kori dise.
Geni Kamki para show te tai bhai laga unrealised song perform korisey. Nijor introduction time te, Geni para koise ki tai Arunachal Pradesh pora ase, kintu etiya Guwahati te homeopathy porhi ase. Student hoi thakile bhi, tai social media te bishi active ase.
Tai ekjon dancer, singer aru content creator ase, aru Instagram te tai laga 1.2 million pora bhi bishi followers ase. Tai regular karone nijor dancing aru singing skills laga videos, logote daily life laga glimpses bhi post kori thake.
Geni viral sensation hoisey tai hit Telugu song “Vachindamma” te dance kora video karone. Itu song tu 2018 sal laga film Geetha Govindam pora ase. Video te tai porha kori thaka dekha jai, kintu olop pichete uthikena song te dance kora shuru kori dey.
Itu clip khub jaldi viral hoisey aru etiya social media platforms khan milaikena 134 million views cross kori dise.
Geni laga video te iman views ase kuina Samay bishi shocked hoisey. Itu panelist Balraj Ghai mazak kori koise ki “Samay laga videos te bhi etia iman views nai.” Samay bhi itu mani loise aru koise, “Nahi hai bhai.”
Tai logote, Samay para Geni ke nijor seat offer kori dise aru koise ki tai panelists khan logot bohi thakibole deserve kore.
Geni India’s Got Latent te ahise time te, tai viral video te 118 million views ase kuina koisey. Kintu pichete itu laga popularity aru bhi bisi hoisey, aru etiya itu eki video 134 million views cross kori dise.
