Israel te human trials soru hoishe

Jerusalem: November 7, 2020. Sunday din para Israel khan COVID-19 vaccine candidate nemite human trials soru hoishe. Kamyaab hoikena aha saal summer te general public nemite tayar thakibo koishe. Trial kora samai 80 volunteers khan para part lobo aro December moina dak te 960 manuh logot loboli ase koishe. Etu trials toh kamyaab  hoile toh aha saal April/may moina te 30,000 volunteers logot third stage lobo koishe. “etai ami khan final kam koriase,” koikena Director General of the Israel Institute for Biological Research, Shmuel Shapira para janai thishe. Etu institute toh Defense Ministry para sai ase aro tai khan “BriLife” vaccine toh March moina te janwar logot trials korishe aro agae hafta te khobor janai thishe. Vaccine toh next stage jabole nemite regulatory approval paishe. Head of the institute’s biology division, Shmuel Yitzhaki para Reuters logot koishe ke, jodi vaccine toh bapana neshina bhal koile, aha saal summer samai general public khan paijabo. Etu samai first batch volunteers khan vaccine toh loishe, Aro desh pura te tuita(2) wala lockdown kotom hoikena aha nemite students khan school te jaa soru hoishe. Israel te 9 million oper manuh ke restriction hoikena thaka toh asti para hatai asem keli koile bemari rate toh komti howa nemite. First samai 4 graders khan Sunday din school te jaishe aro tangor bacha khan toh etai be ghor para lesson loiase koishe. Desh te government para neum hesab te businesses aro recreational kam toh koliboli hokom thishe. Desh te Friday din dak te 674 notun bemari cases paishe. Olop hafta  agae te 9,000 oper thaka besi komti te lamishe. Bemari olaikena beche 2,541 manuh morikena ase koishe.