Kumbh Mela te 5000 nishena covid 19 positive paise

April 18, 2021. April 1 darik para loikena Maha Kumbh Mela te sob melaikena 5,037 manuh logot Covid19 positive tested paishe aro etu bemari para 9 jun morikena ase. Media khobor hesab te itya dak Haridwar Kumbh Mela te 96 manuh ke positive tested powa pithor te 28 jun ke Friday din te thurishe. April 7 darik te sob melaikena 9 jun healthcare workers ke Covid19 positive thurishe aro 7 jun ke mela te positive paishe. Haridwar Kumbh Mela te Covid 19 positive cases otha nemite Prime Minister Narendra Modi para Kumbh Mela laga top leader logot  sapa rakiboli koishe. PM Modi para Twitter te koishe ke, tai Juna Akhara laga Mahamandaleshwar, Swami Awadheshanand Giri logot phone te kotha korikena Covid19 positive cases othi-thaka nemite Maha Kumbh toh bhal para saboli janaishe. PM Modi para kotha kora beche, leaders khan para pilgrims logot next Shahi snan te manuh besi jama nahoboli janaishe. PM Modi para kotha kora manuh toh Thursday din 65- umer Nirwani Akhada laga Mahamandaleshwar Kapil Dev Das Covid 19 bemar para mora nemite ase koishe. Tai mora beche, tuita(2) Sanyasi aro Shaivite sects, Niranjani aro Anand Akhadas toh Kumbh para olai jaboli junaishe. Union health ministry data hesab te, India laga hotai din cases otha te 24 gonda pithor te 234,692 Covid19 cases thakishe, etu sob melaikena itya 1.45 crore cases ase koishe. Ministry para koishe, 10 states- Maharashtra, Uttar Pradesh, Delhi, Chhattisgarh, Karnataka, Madhya Pradesh, Kerala, Gujarat, Tamil Nadu and Rajasthan te notun Covid 19 cases toh 79.32% hoishe. Maharashtra te 1 din pithor cases toh sobse besi notun 63,729 Covid19 cases thakishe. Etu beche Uttar Pradesh te 27,360 cases aro Delhi te 19,486 notun cases thakishe, koikena Union ministry para janai thishe.