London: Thursday din te Manchester United para Ole Gunnar Solskjaer ke club laga permanent manager hesab te chunishe. Ole Gunnar Solskjaer toh Mnchester United logote teen saal laga contract sign kurishe. Ole Gunner Solskjaer toh United logote ekdam kamiyab caretaker samay thakishe.
Norwegian toh United te caretaker manager hesab te December moina te samil huwa pichete United toh ekdam bhal para uthishe. Ole Gunner Solskjaer toh December moina te Jose Mourinho ke kaam para olai diya pichete ahishe. Ole Gunner Solskjaer toh tai laga 19 games te 14 games toh jeetishe aro United ke Champions League laga quarter finals te pungchibole modot kurishe.
Solskjaer toh United nimite 366 appearances te 126 goals marishe. Solskjaer toh United fans khan nimite agay para he hero toh thakishe. Solskjaer toh 1999 Champions League final te goal mari de kena United ke Champions League jeetibole modot kurishe.
Solskjaer para club laga website te koishe moi United te aha sob para poila din para he etu khan club te ghor ahesas (feel) kurishe. Manchester United laga player hubole toh etu moi nimite bishi khushi laga kotha ase. Aro etiya moi laga coaching career suru kura nimite moi bishi khushi ase.
Add Comment