Imphal, March 3 : Manipur laga Governor, Miss Anusuiya Uikey para Sunday din te, Imphal laga Palace Auditorium of Manipur State Film Development Society te North East India Film Festival (NEIFF 2024) inaugurate kurisey.
Inaugural function te kotha kurikina, Governor Anusuiya para koisey ki etu film festival organize kora laga asli objective tu film bana manu khan ke film bana laga art aro technical quality exchange kuribole moka dibole laga asey. Film te participate kora manu khan, actor, actress aro technician khan kuntu jaga para hoisey koilebi, film para taikhan ke ekjun ekjun laga karib aney. Tai para koisey ki bhal film laga impact tu samaj laga character banabole nimitey bhal asey, khas kurikina jawan manu khan laga.
Commercial film para audience khan ke entertain kuribole kosis korey aro taikhan ke larayi jhagra, mara mari nisna bhal nathaka object para taikhan laga dhyan hataidiye. Tai para sob film bana manu khan ke bhal film banabole appeal kurisey kuntu para youth ke taikhan laga dhorom aro culture logotey connect hoikina thakibole inspire kuribo.
Etu governor para agey barikina koisey ki Manipuri cinema tu lagatar bari asey, 35 mm black and white film logotey suru kurikina. Video khan para bi Manipuri cinema laga duniya te contribute kurisey. North East India tu etu laga ameer culture aro artistic talent logotey samaj te bodli anibole laga enaka mushkil homoitey samaj ke improve kuribole nimitey bhal quality laga film produce kuribo. North East India laga tribes logotey ekta ameer cultural heritage asey aro taikhan laga purana jamana laga khisa tu film banabole nimitey bhal script material hobo parey. Enaka film khan para manu khan ke tribal samaj laga shandar art aro culture ke bujibole laga ekta moka dibo. Aro tribal society laga bright side tu modern(ajikali) laga samaj te reveal hobo.
Add Comment