Imphal, November 6 : Manipur para duijun student laga dead body taikhan laga haath te dibole demand kuri thaka homoitey, aro duijun youth kuntu te minor(18 years nichey thaka baccha) bi shamil asey taikhan haraikina asey.
Etu duijun haraikina thaka chokra tu Imphal West District laga Lamshang Police Station under te thaka Akham Awang Leikai para asey.
Etu duijun chokra laga parivar aro local manu khan para kuwa hisap te, etu duijun chokra tu Sunday din laga phujur 9 am fale Imphal West District laga Sekmai jag ate ekta meeting karney jaisiley. Hoilebi etu duijun tu 12 par huwa picheyte bi ghor wapas naha nimtey parivar khan para taikhan ke call kurisey. Hoilebi taikhan para eku jawab panai.
Local manu aro etu duijun laga parivar para etu te Kuki jati laga kunba badmash khan laga haath asey koikina suspect kuri asey aro rajya laga sarkar ke etu duijun chokra ke bisarikina olabole nimitey tez action lobole request kurisey.
Etu picheyte etu duijun laga parivar para Lamshang Police Station te ekta missing report file kurisey. Etu majotey, local manu aro etu duijun chokra laga parivar para Manipur Governor Anusuiya Uikey ke Raj Bhavan te aro Manipur laga naam laga Raja Leishemba Sanajaoba ke din fale Manipur Royal Palace te lok kurisey. Tai tu Rajya Sabha laga MP bi asey.
Taikhan para governor aro MP duijun ke bi etu harikina thaka duijun chokra ke bisaribole request kurikina ekta memorandum submit kurisey. Taikhan para Manipur laga CM Biren Singh ke bi ekta memorandum dibole plan kuri asey. Aro etu mamla te ekta Joint Action Committee (JAC) bi banaisey.
Etu bich te, online te dikha hisap te Sekmai area fale capture huwa CCTV footage para etu duijun chokra ke Kanglatombi koikina ekta jaga fale bike cholaikia jai thaka dikhaisey.
Police para kuwa hisap te, etu duijun laga mobile phone ke Senapati Oil pump osor te trace kurisey. Kangpokpi District Police, Assam Rifle aro CRPF khan para taikhan ke bisarikina olabole nimitey suspect thaka jaga khan te talashi kuri asey.
Add Comment