Imphal, August 4 : Jati laga bich te larayi chuli thaka Manipur rajya laga Imphal West te August 3 te kunba gusa uthikina thaka badmash khan para ekjun sipahi ke moraidisey.
Reports hisap te, etu sipahi ke Imphal West laga Senjam Chirang jaga te moraidisey.
Juwa 24 ghonta te, Manipur te situation tu bisi biya hoikina thakisey aro homoi homoitey guli mara mari huwa aro gusa uthikina thaka bhir khan jama huwa laga ghotna tu hoi thakey.
Sipahi khan para Manipur laga khatra thaka area khan te talashi kora laga operation rakhisey. Sipahi aro police khan para milikina Koutruk pahari area te ekta operation rakhisey aro 7ta illegal bunker ke barbad kuri disey.
Gusa uthikina thaka bhir para 7th Bn. Manipur Rifles, 2n1 Bn. Manipur Rifles, Heinaang Police station aro Singjamei Police Station para hathyar aro barud khan lootibole kosis kurisiley hoilebi sipahi aro police khan para taikhan ke rokhaisey.
Dusra fale, Koutruk, Haraothel aro Senjam Chirang area te hathyar bukhikina thaka badmash aro sipahi khan laga majotey guli mara mari hoisey. Etu ghotna te duijun manu ke guli lagisey aro etu duijun majotey ekjun tu sipahi thakisey.
Sipahi khan para etu guli laga jawab disey aro badmash khan ke hamla kurisey hoilebi ekjun security tu jokhom paikina murijaisey.
Agey barikina, Phougakchao Ikhai jaga te gusa uthikina thaka 500-600 manu laga bhir jama hoisey aro sipahi khan para taikhan ke khedabole nimitey tear gas shell cholaisey. Etu homoitey 25 manu tu chutu mutu jokhom khaisey.
Add Comment