Imphal, December 3 : Manipur laga Tengnoupal district laga Kuki-Zo tribal bodies para olop din ageyte Government of India aro Meitei militant faction, UNLF (Pambei) laga majotey ‘Peace Agreement’ kora tu swagat kurisey. Hoilebi, taikhan para Kuki-Zo tribal area khan te surrender kurikina thaka atangwadi khan nimitey designated camp bana laga khilaf te oppose kurisey.
Etu Tengnoupal District laga Joint Kuki Civil Society Organisations kuntu te Kuki Inpu Tengnoupal, Kuki Chiefs Association Tengnoupal, Kuki Students’ Organization, Tengnoupal aro Hill Tribal Council Moreh shamil asey taikhan para etu ‘Peace Agreement’ laga tariff kurisey kuntu tu etu ban hoikina thaka atangwadi UNLF ke mainstream te anibole nimitey jaruri kadam asey. Taikhan para koisey, “Amikhan biswas kuri asey ki olop din ageyte sign kora ‘Peace Agreement’ para jhamila chuli thaka Manipur valley te ekta shanty bhara mohol banabole nimitey rasta khulidibo.”
Etu agreement laga natija opor te chinta jataikina, Kuki bodies khan para koisey ki UNLF cadre khan nimitey banabole thaka designated camp te Kakching Khunou, Ingourok, Jiribam, Kwatha aro Moreh jaga shamil asey aro Kakching Khunou jaga ke charikina etu sob jaga tu tribal area bhitor te giri asey.
Joint Tengnoupal CSO para Kuki-Zo tribal area nohoilebi etu laga osor te surrender kurikina thaka Valley-based Insurgent Groups (VBIG) nimitey designated camp bana laga khilaf te problem thaka tu janaisey. Tengnoupal District laga Kuki-Zo public para etu shanty laga agreement ke swikar kurisey hoilebi Kwatha, Moreh, Jiribam aro Ingourok jag ate plain area te boha atangwadi khan laga designated camp banabole laga faisla tu reject kuridisey.
Kuki-Zo bodies khan para kuwa hisap te, enaka kadam utha tu Chief Minister N. Biren Singh para rajya te Kuki-Zo tribal aro alag tribal jati khan ke khatra te dhalibole lga khatarnak kosis asey. Taikhan para etu behes kurisey ki tribal khan para dominate krikina thaka pahari area khan te etu plain area te boha atangwadi khan ke jaga diya para ahibole homoitey taikhan nimitey bhalayi nohoikina diktar anidibo.
Kuki-Zo tribal khan para Biren Singh para chola Meitei sarkar laga taraf para gusa utha te react koranai hoilebi etu bayan para etu clear hoisey ki taikhan para pahari district Tengnoupal aro Jiribam te UNLF nimitey camp banabole laga plan laga khilaf te jabo.
Joint Tengnoupal CSO para samjhaisey ki Meitei atangwadi group(UNLF) khan nimitey enaka camp bana tu Mnaipur valley (Kangleipak) area tak hey thakibo lagey. Pahari district te banabole kosis kora tu bhal nohobo.
Add Comment