IMPHAL: Saturday din Imphal te function ekta thaka samai Manipur Chief Minister N. Biren Singh para alag-alag Chief Medical Officer khan logot 15 basic life support ambulances dishe. National Highways Infrastructure Development Corporation Ltd. (NHIDCL) para Manipur Government ke ambulances toh donated korishe. Ekta-ekta ambulance toh Kakching CHC, Ukhrul District Hospital, Thanlon PHC aro Haochong PHC logot dibo koishe aro baki toh Directorate of Health Services headquarters te raki-thakina emergency samai dosura districts logot dibo, koikena chief minister para janaishe. “COVID-19 bemari soruh kora samai, Manipur te besi healthcare centres aro districts te ambulances nathaka nemite besi dukh hoikena ase. Hoilebi, jodi te State Government para notun 14 ambulances kena nemite bemari logot larai kora samai besi motob bapoli ase,” Singh para koishe. “itya Manipur laga sob 16 districts te ambulances ase. Saturday din NHIDC para donated kora jarikena itya State te 12 Advanced Life Saving ambulance aro14 Basic Life Saving Ambulances ase” Singh para aro koishe. Chief minister para janaishe ke, extra ambulances toh home isolation te thaka bemar manuh nemite saboli rakina ase. Government para sob district te jodi lakishe koile aro ambulances toh samai-samai te thiboli janaishe. Singh para koishe ke, state te medical oxygen toh stock te ase. Manipur te itya 1098 D-Type cylinders, 242 Oxygen Concentrator Machines aro 90 Ventilators ase. Itya thaka tinta(3) oxygen generating units jarikena, Government para aro Shija Hospitals logot oxygen bonaboli manishe, Singh para janaishe. Tai para aro koishe, Remdesivir tawai toh stock te rakina ase aro dosura 1000 vials neshina April 25 darik te pongchise. Itya samai, JNIMS te 100 COVID beds ase aro RIMS te 52 ase aro sob district hospitals aro alag-alag private hospitals te COVID beds rakina ase koishe.
Manipur logot notun 15 ambulances dishe
