Imphal, January 16 : Manipur sarkar para January 16 para Tengnoupal district te ekta total curfew lagu kuridisey.
Tengnoupal district laga magistrate para poila te daily curfew relax kuridiya tu cancel kuridibole laga faisla kurisey aro agey notice naha tak enaka chuli thakibo.
Etu curfew impose kora tu sarkar para tatey order tu maintain kurikina rakhibole kosis kora aro larayi jhagra hobole para rokhabole nimitey kadam utha laga ekta hisa asey.
District Magistrate para issue kora order te enaka koikina asey, “District Magistrate laga office para Code of Criminal Procedure, 1973 laga Section 144 under te agey order nidiya tak 30-12-2023 te kun manu hoilebi taikhan laga ghor para bahar aha juwa nukuribole nimitey prohibitory order issue kurisey; Aro ageybarikina 14, January 2024 te etu office order ke saikina ekta curfew relaxation order issue kurisiley kuntu te curfew relax kora tu aam public khan ke jaruri saman jaiseki dawai aro kha luwa khan kinibole dibole nimitey thakisey.
Aro, kotba para Tengnoupal District bhitor te shanti bhangibole, public laga shanti te badha ahibole chance asey koikina khufiya jankari pai asey; Etu nimitey, etya curfew relax kuridiya tu cancel kuri asey aro Tengnoupal district laga pura area te date 16 laga phujur 12:00 am para total curfew thakibole asey.”
Etu order tu kanoon aro beybosta enforce kora aro jaruri service khan samhala te shamil thaka sarkar laga agency khan te lagu nohobo.
