Regional

Manipur SEC para Lok Sabha election ageyte media nimitey guideline issue kurisey

March 28, 2024
2 Views

Imphal, March 27 : Ahibole thaka Lok Sabha election nimitey tayari kurikina, Manipur state election commission (SEC) para Wednesday (March 27) te media nimitey guidelines release kurisiley. 

Etu guideline te election laga rules hisap te, jati nohoilebi caste line laga opor te election campaign prohibit(nukuribole) emphasize kurisey. 

Etu guideline te press ke enaka report khan publish kuribole mana kurisey kuntu para dhorom, race, caste, community nohoilebi bhasa laga hisap te, manu khan majotey dushmani nohoilebi ghing lagiya laga bhabna olaidibo parey. 

Manipur tu taikhan laga duita parliamentary constituency, Inner Mnaipur Lok Sabha seat aro Outer Manipur Lok Sabha seat nimitey April 19 aro 29 te election kuribole tayar asey.

Etu guideline te press laga  election aro candidate khan ke loikina hosa hosi reporting dibole laga duty mention kurikina asey.

Newspaper kahn ke unhealthy election campaign te shamil thaka laga khilaf te, bara chiraikina report diya nohoilebi election laga process te candidate nohoilebi ghotna khan laga biased coverage(matlab kunba laga bhal aro kunba laga biya reports) diya laga khilaf te savdhan kurikina asey. 

Agey barikina, etu guideline te kun candidate laga bi personal character nohoilebi beybohar laga galat nohoile naam botnam kora laga statement dibole mana kurisey. Aro candidate nohoilebi party laga khilaf te verify nukurikina thaka iljam khan publish nukuribole laga importance janaisey. 

Press ke candidate nohoilebi political party khan laga haath para eku kisim laga ghoos, poisa nohoilebi alag bustu khan luwa laga khilaf te bi warn kurikina asey. Aro oppose kora candidate nohoilebi party khan ke jawab dibole laga haak nidikina ekta candidate nimitey behes kuribole bi mana asey. 

Etu opor te, press ke power te thaka party nohoilebi sarkar laga achievement ke promote kuribole nimitey public laga poisa offer kurikina advertisement publish kuribole diya tu swikar nukuribole nohoilebi publish nukuribole instruction disey.

Newspaper khan para election commission, returning officer aro Manipur chief electoral officer (CEO) para issue kora sob directive ke manibole compulsory asey.