Imphal, October 23 : Manipur laga Imphal police station under te thaka Uripok Khoisnam Leikai te ekjun 25 saal laga jawan manu ke ekjun 22 years laga student ke guli maridiya nimitey arrest kurisey.
Etu ghotna huwa tu Manipur police para Monday (October 23) te confirm kurisey.
Imphal laga Uripok te thaka Takhhellambam Deepu Singh (25 years) para muk laga lagi huwa picheyte Ahanthem Ritesh Kumar (22 years) ke guli marikina jokhom kuridisey.
Ahanthem Ritesh Kumar tu Manipur laga Imphal West district laga Uripok Sorbon Thingel Leikai te bohey aro tai tu DM College of Arts laga ekta student asey.
Guli tu tailaga chin te lagisey.
Guli tu tailaga chin para par hoikina jaisey aro Imphal laga Raj Medicity hospital laga ICU te tailaga ilaj chuli asey.
Manipur police para kuwa hisap te, Ahanthem Ritesh Kumar ke guli marikina jokhom kuridiya tu October 20 laga rati 9pm fale thakisey.
Etu ghotna laga connection te Imphal police station te ekta case register hoisey aro agey investigation chuli asey.
Guli mara manu, Deepu ke Saturday (October 21) laga rati te arrest kurisey aro etu jurum kuribole nimitey chola hathyar bi recover kurisey.
Add Comment