Imphal, August 4 : Union Sports Minister Anurag Thakur para Agugust 3 te Parliament ke janaisey ki India laga sobsey first sports university tu Manipur te banabole asey.
Etu Sports University tu Rs 643.34 crore khorcha kurikina banabole asey.
Parliament para North East te Sports laga subidha aro jaga ke loikina sawal kora te jawab dikina Minister of Youth Affairs & Sports Anurag Singh Thakur para koisey ki sarkar para ‘Look East Policy’ ke bodli kurikina ‘Act East Policy’ banaidikina Northeast te sports laga subidha nimitey khas dhyan aro jor di asey.
Tai para etu bi koisey ki desh laga first national Sports University banabole laga kaam tu northeast rajya Manipur ke disey aro etu nimitey Rs 643.34 crore sanction kurisey.
Etu commitment kora laga bhag te Northeast laga sob district te duita Khelo India centre banai asey. Etu para agey barikina sports laga mohol ke behtar banai asey aro jawan khilari khan ke taikhan laga sapna pura kuribole hosla barai asey.
Etu Minister para etu bi koisey ki North East laga rajya khan te 227 Khelo India centre tu already banaikina asey. Aro etu para sports laga talent thaka khan ke agey baribole nimitey ekta mohol banabole modod kuri asey.
Etu ekla nohoikina North East te sports laga subidha ke behtar banabole nimitey sarkar para etya sports ke loikina 75 project suru kuri asey kuntu te Rs 520 crore maan jai asey.
Add Comment