Shillong, July 28 : Tura laga ghotna te aha ekta nutun khobor te, Trinamool Congress (TMC) youth leader Richard Marak tu bisi biya para bimar hoijaisey aro taikey Tura Civil Hospital te admit kurikina asey. Richard, kun ke Chief Minister laga hutu Secretariat ke hamla kora laga sajish te shamil thaka nimitey arrest kurey tai para gao thik nathaka laga complain kurisey. Aro etu nimitey police khan para taikey hospital te ilaj nimitey loijabo lagisey.
Police para etuTMC youth leader laga custody manga pichetey Tura laga district court para taikey olop din agey te 3din nimitey hirasat te rakhibole order disiley. Etu gondogol te Richard shamil thaka tu titya najar te ahisey jitya etu hamla kora te shamil thaka bisi Trinamool workers khan ke police para dhurisey. Ekjun arrest huwa Trinamool supporter para police ke etu janaisey ki hamla kora pichetey dhora nakhabole nimitey tai tu Richard laga ghor te buhi thakisey.
TMC leader Dr Mukul Sangma para react kurikina koisey ki Richard arrest huwa tu West Garo Hills Police para power te thaka rajneetik boss khan laga order paikina kora laga asey.
Etu homoitey Deputy CM in charge of Home(Police) Prestone Tyngsong para iljam lagaikina koisey ki Tura te hamla huwa tu kunba rajneetik party khan para motivate kora laga asey. Etu case te 45 manu arrest hoisey aro etu majotey bisi bhak manu khan tu rajneetik party logotey jurikina asey.
Add Comment