Ageybarikina, etu case khan tu mainly Garo Hills laga plain jag ate olaisey.
Health Minister Ampareen Lyngdoh para Meghalaya laga manu khan ke chinta nukuribole koisey aro koisey ki taikhna para etu situation ke kamyab hoikina manage kurisey.
Hoilebi, tai para jaruri precautions lobole laga jarurat samjhaisey. Lyngdoh para lamba homoi para bimar hoikina thaka manu khan ke bhal para check up aro ilaj kuribole nimitey sobsey osor te thaka testing centre te jabole koisey.
October 12 te, Megahlaya laga hospital te 7ta dengue test kurisey aro etu te khali duita hey positive result olaisey. Dengue bimar para murija patient tu West Garo Hills laga ekjun mota thakisey. Etu mota ke hospital te anisiley hoilebi tai tu murijaisey. Aro ekjun manu laga jaan bi dengue hemorrhagic bimar logotey jurikina thaka brain hhaemorrhage para murijaisey.
Lyngdoh para bharosa dilaisey, “ Amikhan para etu case khan ke bisi bhal para control kurisey aro kun manu khan etu bimar para effect hoikina asey taikhan ke bhal ilaj di asey. Amikhan para etu case baribo koikina bhabna nai. October 3 para loikina juwa kali(October 12) tak 44 case record kurisey. Etu case tu olop din agey te flood huwa aro dangor pani gira nimitey barisey.
Health department para Meghalaya laga sob district ke Standard Operating Procedures (SOPs) ke manikina chulibole karney alerts issue kurisey. Taikhan para alag alag community, dorbar aro alag manu khan logotey milikina active para kaam kuri asey. Medical block officer khan ke etu identify kurikina thaka dengue case khan laga joldi kiba kuribole instruction disey.
Add Comment