April 20, 2021: India laga state pura te COVID-19 cases besi jai thaka nemite, Meghalaya government para state te tourists khan ahiboli ban korishe. Meghalaya te tourists khan ke restrictions toh April 23 darik para soruh koribo koishe. Etu fesla toh Meghalaya Chief Minister Conrad Sangma para junai thishe. “Meghalaya state te bahar para aha tourists khan ke doorja toh 23rd April 2021 para soruh hobo,” koikena CM Conrad Sangma para koishe. Hoilebi, tourism sector para local tourists logot toh mana nakoribo. “Local tourism toh jai thakibo,” Meghalaya CM Conrad Sangma para aro koishe. Etu oper te, Meghalaya Government para aro tourists jaga sob bondh koriboli fesla loishe. “tourist jaga aro tourist khan para visit kora jaga sob bondh thakibo,” Meghalaya Chief Minister para janaishe. “RT-PCR tests samai laga 72 gonda thaka toh 48 gonda te komti korishe,” koikena Meghalaya CM Conrad Sangma para aro khobor toh janaishe. Sunday din Meghalaya state pura jaga te COVID-19 positive cases toh notun 73 thurishe, etu melaikena itya 680 active COVID-19 cases hoishe. Meghalaya te COVID-19 bemari para 153 manuh morikena ase koishe.
Meghalaya para tourists ban korishe
