Meghalaya:Oil tanker khan para hartal  hatai disey, petrol aro diesel laga supple wapas suru kuribole asey

Shillong, November 29 : Northeast laga Meghalaya rajya te petrol aro diesel laga supply wapas suru hobole asey.

Oil tanker laga driver aro North East Petroleum Mazdoor Union (NEPMU) para Meghalaya sarkar laga official khan logotey ekta meeting rakha picheyte taikhan laga hartal bon kuridisey.

Etu meeting tu Meghalaya laga Ri-Bhoi district laga Nongpoh koikina ekta jag ate hoisey.

Poila te, oil tanker laga driver aro NEPMU para Indian Oil Corporation Limited (IOCL), Bharat Petroleum Corporation Limited (BPCL) aro Hindustan Petroleum Corporation Limited (HPCL) laga petroleum saman jaiseki(kerosene, fuel khan) tu Novemebr 29 para supply kora bon kuridibole faisla kurisiley.

NEPMU para Meghalaya minister of food, civil supplies aro consumer affairs ke ekta letter likhisey.

Taikhan para etu iljam lagaisey ki Meghalaya police laga personnel khan para rajya laga Ri Bhoi district te, oil tanker laga driver khan ke parishan kurikina ahi asey.

Letter te enaka likhikina thakisey, “Taikhan para etu mamla thik nuhuwa tak 29 November, 2023 para IOCL, BPCL aro HPCL para Meghalaya nimitey eku load noloijabole bi faisla kurisey.”

Aro koisey ki Meghalaya police khan para 22 Mile te khana khabole nimitey Dhaba laga bahar te rukhikina thaka kunba tanker khan ke joborjosti dhurisey aro case register kurisey. Next din te bi, police para eku karon nathakikina kunba load hoikina thaka tanker ke rokhaikina rakhisey.

Taikhan para koisey, “ Etu mamla laga bhabna kurikina Tanker Driver khan para Petroleum saman khan laga load lobole aro Meghalaya te gusibole bi bhoi khai asey.