Aizawl, January 31 : Mizoram laga student body Mizo Zirlai Pawl para protest kurikina Prime Minister Narendra Modi aro Union Home Minister Amit Shah laga poster khan jolaisey. Etu protest tu India-Myanmar border fale fencing aro Free Movement Regime (FMR) lagu kora laga agaimst te kora asey.
Etu student body para Myanmar logotey border fencing aro Free Movement Regime (FMR) khotom kuridiya laga against te protest kurisey.
Press release te, MZP para samjhaisey ki Mizo jati khan tu Myanmar, Bangladesh aro India laga kunba rajya bhitor te buhi asey. Taikhan para koisey ki Mizo khan ke bhak kuridiya nohoilebi alag alag kuridiya laga border tu British para tatey thaka manu khan laga monjuri noloikina impose kurisey aro Mizo khan para taikhan laga mon te kitya bi etu border khan ke swikar koranai.
Agey barikina enaka koisey ki central government para FMR khotom kuridibole laga kosis kora aro border fencing dhalibole kosis kora tu border par fale thaka Mizo jati laga khandan khan logotey baat-chit, samajik activity aro modod khan kora te badha anidibole nisna dikhi asey. Etu nimitey taikhan tu India laga sarkar para aji kali kadam utha laga opor te apsoos jataisey aro etu kadam utha laga khilaf te oppose kuri thakibo koikina declare kurisey.
Mizo Zirlai Pawl para central government ke illegal drugs aro prohibit kurikina thaka manu khan ke border te badha na anikina dusra tarika bisaribole request kurisey.
Agey te, MZP para Mizoram Chief Minister Lalduhoma aro Home Minister Sapdanga ke lok kurikina action lobole request kurisiley. Ageybarikina, MZP para Prime Minister Narendra Modi ke ekta memorandum submit kurisey, Union Home Minister Amit Shah, Vice President aro Union Home Secretary ke etu memorandum laga copies pathaisey.
