Agartala, January 31 : Lok Sabha election laga ageyte, Tripura te opposition political party aro main opposition paty, Tipra Motha para ekta dangor jhatka paisey kilemaney Wednesday(Jnauary 31) te 1500 opor vote diya manu khan BJP join kurisey.
Jama huwa manu khan ke bhasan dikina, BJP state president Rajib Bhattacharya para CPIM aro TIPRA Motha ke Tripura laga indigeneous manu khan laga development nimitey side kurikina rakha poisa ke misa misi cholaidiya laga iljam lagaisey.
Rajib Bhattacharya para enaka koisey, “BJP aro Prime Minister Narendra Modi tu khali slogan te ekla biswas nokorey; taikhan para action ke prioritize korey. PM Modi tu sob manu nimitey kaam kuribole committed asey, indigenous community para suru kurikina. Etu tu PM Modi laga asli agenda asey, hodai manu khan laga bhalayi nimitey kaam korey. Bru manu khan para PM Modi ke support korey, aro etu nimitey taikhan para BJP join kurisey. Juwa 23 saal para, Bru manu khan ke refugee manikina ahi thakisey aro poila laga Tripura government para taikhan nimitey eku kadam uthanai. Etu nimitey PM Modi para taikhan ke Tripura te permanent residency(thakibole laga jaga) dibole faisla kurisey.
Rajib para agey barikina Bru jati laga manu khan ke taikhan laga haak nidiya laga iljam lagaikina CPIM ke criticize kurisey.
BJP Chief para koisey, “Apni para BJP join kurikina thik faisla kurisey. Amikhan para khali kosom nakhai; amikhan tu ki koi etu korey aro amikhan tu aam manu khan nimitey kaam korey. Ekta local tribal political party para taikhan nijor laga faida nimitey apni khan logotey politics khili asey.”
Tai para dawa kurisey ki CPIM para dukhya manu khan laga fund tu misa misi cholaidisye. Aro main opposition Tipra Motha para bi rajya laga indigeneous manu khan logotey ekey kuri asey.
Rajib para agey barikina koisey ki rajya laga sarkar para Tripura Tribal Area Autonomous District Council (TTAADC) nimitey funds bhak kurisey. Hoilebi Tipra Motha para etu poisa khan ke indigeneous manu khan laga development nimitey chola laga bodli etu laga galat istamal kuri asey.
Etu mamla te kotha kurikina, BJP state general secretary Bipin Debbarma para koisey ki Wednesday din te 3ta jag ate, Tripura laga Dhalai District under te thaka Jiulcherra Bru resettlement camp, Dhalai District Party Office aro Kachucherra te etu BJP party join kora programme rakhisey. Kuntu te 1500 opor voter khan para BJP join kurisey aro Tipra Motha aro CPIM charidisey.
