MNF para ECI laga etu faisla ke oppose kora tu Congress party laga Mizoram unit para bi ECI logotey enaka ekey objection utha laga olop ghonta pichyete ahisey.
MNF para ECI ke ekta letter pathaikina vote ginti kora laga tarik bodli kuribole request kurisey.
Election commission para Monday (October 09) te, koisey ki Mizoram ke milaikina 5ta rajya laga assembly election laga vote ginti kora tu December 03(Sunday0 din te hobo.
MNF para ECI ke letter likha te enaka koisey, “ Mizo khan 100% Christian asey aro Sunday din tu Christian khan nimitey ekta important din asey aro pura Mizoram laga sob busti khan te Sunday din te Church Meeting hoi.”
Enaka bi likhisey, “ Mizoram laga rajya te enaka situation thaka nimitey, Mizoram laga Mizo National Front para Election Commission of India ke morom kurikina vote ginti kora laga tarik tu 04.10.2023 te refix kuribole request kuri asey.”
Agey te, Mizoram Congress para bi ECI ke state assembly laga vote ginti kora laga tarik kuntu December 3 asey, etu bodli kuribole request kurisiley.
Chief Election Commissioner Rajiv Kumar ke letter path ate, Mizoram Congress president Lalsawta para koisey ki Sunday din tu Mizoram laga manu khan nimitey ekta pavitra din asey aro etu din ke khali Isor ke worship kuribole nimitey hey rakhey.
Tai para koisey ki Sunday din te eku official programme nohoile business khan narakhey.
Lalsawta para tailaga letter te enaka koisey, “Amikhan janey ki khali Congress party hey nohoi hoilebi Mizoram laga pura Christian community para Sunday din te vote ginti kora tu khusi napabo.”
ECI para para 5ta rajya te assembly election laga tarik announce kurisey, etu hisap te Mizoram laga 40 assembly seat nimitey voting tu November 7 te hobo.
Add Comment