Imphal, September 4 : CM N Biren Singh para koisey ki Manipur laga State government para Editors Guild laga member khan laga khilaf te Manipur te aro bisi jhagra olaidibole kosis kora nimitey ekta FIR file kurisey.
Chief Minister N Biren Singh para Manipur te etya chuli thaka jhamila laga connection te Editors Guild of India laga fact finding( asliyat bisarikina ola) laga report ke kara para condemn kurisey.
Biren para koisey ki Supreme court para Manipur laga etya chuli thaka case tu taikhan laga haath te loisey. Etu situation chuli thaka homoitey, EGI para enaka report ola kuntu te factual mistake asey etu ke jor para condemn kurisye. Aro enaka report para etya laga jhamila ke aro bisi baraidibo koisey. Tai para koisey ki rajya laga sarkar tu enaka kaam laga khilaf te asey aro etu member khan laga khilaf te FIR kurisey.
Biren Singh para enaka koisey, “ EGI tu etya chuli thaka larayi jhagra kinaka suru hoisey etu eman najanikina thaka nisna asey. Rajya laga sarkar logotey etu jhamila laga pura sabut asey. Taikhan para etu sabut lagey koile amikhan laga haath para lobo parey. EGI para enaka report ola tu bisi dangor sorom laga kotha asey kuntu te bisi golti asey. Taikhan laga report dikhikina tu ami ke enaka lagi asey ki taikhan tu rajya laga khilaf nohoilebi desh laga khilaf te asey.”
Biren Singh laga etu bayan tu 3jun member thaka Editors Guild of India laga asliyat bisarikina ola team para Manipur te Meitei aro Kuki majotey larayi jhagra suru huwa homoitey May moina para internet ban kuridiya pichey te Manipur para reporting kuribole muskil hoijaisey koikina kuwa picheyte asey.
Editors Guild para etu janisey ki eku communication link nathakikina local news jama kora tu etu etu halat laga jankari dibole nimitey kafi nai.
Manipur laga journalists khan para enaka likhisey, “Editors Guild laga ekta asliyat bisarikina ola team para Septemmber 2 te taikhan laga report release kora te koisey ki Northeast rajya te jati laga majotey larayi jhagra chola laga khobor cover kora tu ekta side laga hey report asey.”
Taikhan laga report te enaka likhikina thakisey ki aam halat te etu report khan ke taikhan laga editor nohoile local administration, police aro security forces khan laga department laga chief khan para aro re check korey. Hoilebi gondogol chuli thaka homoitey etu kuribole muskil thakisey.
Etu homoitey, All Manipur Working Journalist Union (AMWJU) aro Editors Guild Manipur (EGM) para Editor Guild of India para manu khan laga kotha hunikina enaka iljam laga tu galat asey koisey.
Manipur te journalist khan laga duita apex bodies para EGI para iljam laga opor te safayi dibole nohoile (samjhabole) koisey.
All Manipur Working Journalist Union (AMWJU) aro Editors Guild Manipur (EGM) para judi Editors Guild of India laga fact finding team para taikhan laga report te misamisi iljam laga laga opor te safayi dibole nohoile samjhabole naparisey koiley taikhan laga khilaf te kanooni action lobole dhomki disey.
Ekta khobor release kora te, AMWJU aro EGM para etu report tu adha nijor para bna laga asey kuntu tu 4 din bhitor te pura hoisey.
AMWJU aro EGM para koisey ki etu report te bisi swikar kuribole napara aro galat jankari asey kuntu para rajya laga journalist community laga izzat aro khas kurikina Imphal te thaka news company laga izzat ke barbad kuri di asey.
Add Comment