Aizawl, November 13 : Mizoram te thaka India-Myanmar border tu junta army aro pro-democracy rebel khan laga majotey guli mara mari huwa picheyte khatra te asey.
Sunday (November 12) para loikina Mizoram fale thaka area khan te Myanmar laga international border fale bisi jordar guli mara mari hoithaka laga report olaisey.
Myanmar army aro rebel khan laga majotey guli mara mari huwa picheyte authorities khan para Mizoram laga Champai district te high alert laga awas hunaisey.
Ekso opor Myanmar manu khan India-Myanmar border osor te India laga side fale buhi asey . Reports laga hisap te, guli mara mari tu Myanmar laga army aro Chinland Defence Force (CDF) laga cadres majotey hoisey.
CDF, ekta pro-democracy armed bhitor manu laga group tu 2021 te banisiley. Aro etu CDF tu Myanmar laga army khan para Frbruary 01, 2021 te manu khan laga vote para election jita sarkar ke hataikina raaj kora picheyte military junta khan ke rokhabole nimitey banaisiley.
Reports para etu bi dawa kuri asey ki Myanmar laga air force khan para Myanmar te India logotey thaka International border laga osor te thaka area khan te bomb girai asey.
Hoilebi, Mizoram laga Champai district para manu laga jaan ja nohoilebi property barbad hoija laga eku report olanai.
Add Comment