AIzawl, August 10 : Opposition party khan para Centre te BJP para chola sarkar laga khilaf te no-confidence motion utha te NDA laga ekta partner Mizo National Front (MNF) para support kuribole asey. Etu jankari tu MNF party laga Lok Sabha speaker MP C Lalrosanga para August 10 te disey.
Lalrosanga para media ke kotha kora homoitey koisey ki tai tu Manipur te hoithaka jati laga larayi jhagra te Manipur laga sarkar aro Centre para samhalibole nakamyab huwa nimitey no-confidence motion laga support te vote kuribole asey.
Tai para enaka koisey, “Ami para opposition party laga no-confidence motion ke support kuribo. Aro etu tu ami para Congress ke support kuribole monja aro BJP laga khilaf te jabole monja nimitey nohoi. Hoilebi etu tu sarkar khan para, khas kurikina Manipur laga sarkar para Manipur laga mamla te samhalibole pura puri fail huwa nimitey amikhan laga mon khusi napaikina thaka tu dikhabole karney asey.”
Tai para koisey ki Manipur te Zo jati laga manu khan laga halat dikhikina MNF tu bisi dukh paisey.
Lalrosanga para agey barikina koisey ki tai para etu mamla tu MNF laga president aro Mizoram laga Chief Minister Zoramthanga aro alag leader khan logotey discuss kurisey. Aro taikhan para bi no-confidence motion ke support kuribole monjur hoisey.
MNF laga Rajya Sabha MP K Vanlalvena kun Manipur laga mamla ke loikina bisi awas uthai asey, tai para bi koisey ki tai tu Parliament te sarkar para etu situation ke handle kora laga khilaf te awas uthabole continue kuribo.
Lalrosanga para koisey, “PM Narendra Modi para etu mamla te jawab diya pichetey hey Lok Sabha te no-confidence motion te vote hobo.
Add Comment