Guwahati, August 10 : Assam laga sarkar para sports te ekdam bhal hobole aro rajya laga manu khan laga talent ke istamal kuribole nimitey Guwahati te August 11 te Badminton Association of India (BAI) National Center of Excellence inaugurate kuribole tayar asey.
Etu Centre tu Amingaon Indoor Stadium te ahibole asey. Aro etu centre te world-class subidha aro bisi experience thaka national aro international coach aro top-class support facility thakibole asey.
Etu sobsey latest technique aro technology para bana national badminton centre ke Assam Government aro Badminton Assosiation of India(BAI) para milikina banaisey aro etu centre tu Friday din te launch hobole asey.
Etu centre laga operation aro management tu Assam laga Sports and Youth Welfare Department para samhalibole asey. Aro technical part tu Badminton Association of India para samhalibole asey.
BAI laga etu dangor project te 24 badminton court thakibole asey aro 5000 maan manu buhibo para laga seating capacity asey. BAI center of Excellence tu India te sobsey dangor centre hobole asey aro ekta roof laga under te bisi court thakibole asey.
Etu jaruri occasion ke yaad rakhibole nimitey 2022 te Thomas Cup jita Indian men’s badminton team ke BAI laga president aro Assam Chief Minister Himanta Biswa Sarma para somman dibole asey.
Etu Centre of Excellence te rajya rao pura desh laga talent tu ekdam nichey level para chinibo aro taikhan ke ahibole thaka homoi nimitey tayar kuribo.
Etu moina first fale, Assam Chief Minister Himanta Biswa Sarma para koisiley ki Assam laga sarkar tu rajya te National Centre of Excellence for Badminton banabole nimitey Badminton Asociation of India logotey ekta memorandum sign kuribole asey.
Add Comment