Mizoram police para 43 Myanmar Army laga custody Assam Rifle ke dibole

Aizawl, November 14 : Mizoram police para 43 Myanmar Army personnel laga custody Assam Rifle khan laga haath te dibole nisna asey.

Sources para janaisey ki ministry of home affairs (MHA) para Mizoram police ke Myanmar laga 43 Army personnel laga custody tu Assam Rifle laga haath te dibole suggest kurisey.

Assam Rifle para Mizoram te thaka 400 km opor lamba India-Myanmar border ke guard korey.

Assam Rifle para etu Myanmar laga 43 Army personnel ke Myanmar te wapas pathabole modod kuribo.

Ministry of Home Affairs tu Mizoram police para Myanmar army laga custody rakha mamla te  Myanmar laga authorities khan logotey in touch te asey.

Myanmar Army laga 40 opor personnel khan India fale paar kurikina aha picheyte, taikhan ke custody te loisey.

Etu arrest huwa Myanmar Army personnel khan ke Mizoram laga Zokhawthar police station te official khan para custody te loisey.

Arrest huwa Myanmar Army khan tu Myanmar laga People’s Defence Force (PDF) military para taikhan ke khedai diya picheyte Indian Territory te illegal tarika para gusisey.

PDF para Mizoram laga Champai district te thaka Zokhawthar para international border laga utu taraf te thaka desh (Myanmar) te Myanmar Army laga komsikom duita camp ke kapza kurisey.