Aizawl, March 27 : Mizoram laga main opposition Mizo National Front (MNF) president Zoramthanga para ruling Zoram People’s Movement (ZPM) ke National Democratic Alliance (NDA) laga hisa hobole nimitey BJP logotey chup chap para haath mila laga iljam lagaisey.
Zoramthanga para etu iljam laga tu enaka homoitey ahisey jitya ZPM para dawa kurisey ki taikhan tu centre te kuntu alliance logotey bi rishta nabanabo aro ekta independent regional party hoikina thakibo.
Tuesday din te, Mizoram laga Saitual town te ekta rally ke address kurikina Zoramthanga para iljam lagaisey ki ZPM leader aro Chief Minister Lalduhoma para Assam laga CM Himanta Biswa Sarma ke juwa saal laga Mizoram assembly election hobole ageyte approach kurisey taki ZPM tu NDA laga ekta hisa hobo paribo.
Tai para agey barikina iljam koisey ki Lalliansawta para chola ZPM tu state assembly election hobole ageyte BJP para modod paisey.
Tai para koisey ki ZPM tu assembly laga voting hobole thik ageyte achanak para taikhan laga haath te bisi poisa paisey kilemaney taikhan para nijor ke BJP ke bikri kuridisey.
Etu former Mizoram Chief Minister para koisey ki ZPM para MNF ke NDA logotey rishta bhangabole dibole mon thakisey taki taikhan nimitey etu alliance laga hisa hobole rasta khulidibo.
Tai para koisey ki NDA para MNF ke ekta badha anidiya party nisna dikhey kilemaney taikhan para Mizoram ke affect kora mamla te bhitor para oppose korey. ZPM tu MNF nisnaNDA ke oppose kuribole naparibo.
Zoramthanga para kosiey ki Assam aro Mizoram majotey jhamila chuli thaka homoitey Union Home Minister Amit Shah para Mizoram police ke border area para hataidibole joborjosti nokora hoisey.
Tai para agey barikina koisey ki MNF government para strong opposition kora nimitey Citizenship Amendment Act (CAA) laga under te Mizoram ke exempt kurikina thakisey. MNF government para desh te Uniform Civil Code (UCC) lagu kora ke oppose kruikina ekta resolution loisiley.
Ageyte, Chief Minsiter Lalduhoma para kosiey ki tailaga party tu Centre laga sob alliance laga control para independent aro free thakibole chunisey.
Tai para koisey ki ekta regional party tu Centre te duita bloc NDA nohoilebi INDIA logotey milikina thaka tak tu eku important mamla te taikhan laga bhabna rakhibo naparibo aro independent faisla bi lobole naparibo.
Hoilebi, Lalduhoma para koisey ki tailaga government tu Centre te power te aha government logotey pura mondikina kaam kuribo.
Add Comment