Aizawl, October 17 : Congress leader Rahul Gandhi para Tuesday (October 17) te, Mizo National Front (MNF) aro opposition party Zoram People’s Movemnent (ZPM) laga opor te tikha hamla kurisey aro taikhan tu Bharatiya Janata Party (BJP) aro Rashtriya Swayamsevak Sangh (RSS) ke Mizoram te entry dibole laga ekta jariya asey koisey.
Rahul Gandhi tu Mizoram te ahibole thaka assembly election te Congress party laga candidate khan nimitey campaign kuribole nimitey Mizoram te dui din thakibole ahisey. Tai para koisey ki BJP aro RSS para Mizoram aro Northeast laga alag rajya khan laga tradition, culture aro dhorm ke hamla kuri thakisey.
Gandhi para Aizawl te ekta press conference te enaka koisey, “ MNF aro ZPM tu Mizoram te BJP aro RSS nimitey ekta entry point asey. MNF tu sidha BJP logotey milikina asey aro ZPM tu BJP laga against te larayi kora nohoi. Etu tu safa safi dikhi asey ki taikhan tu BJP nimitey entry points asey.”
Tai para agey barikina koisey ki MNF aro ZPM ke BJP para Mizo laga culture, tradition aro religion ke hamla kuribole laga ekta hathyar nisna cholai asey.
Tai para BJP aro RSS laga India ke centralize kurikina ekta single ideology para chola laga vision ke Congress laga India ke decentralize kora aro alag alag dhorom, culture aro etihas ke mana laga vision logotey compare kurisey.
Tai para BJP laga against te India laga institutional framework ke kapja kuribole kosis kora laga iljam lagaisey aro koisey, “ Congress party para amikhan laga desh lagafoundation dhalibole modod kurisey aro amikhan logotey utu foundation ke defend kora laga record asey. Amikhan para enaka maney ki desh laga institutional framework tu ekta rajneetik party nohoikina public khan ke belong korey.”
Rahul Gandhi para ahibole thaka assembly election te, Congress laga performance opor te pura biswas jataisey aro congress party laga development scheme aro Congress para chola alag rajya khan te social security initiatives lagu kora tu janaisey.
Tai para old ension scheme ke wapas anibole laga, gas cylinder laga daam komabole laga. ‘Tangpuihna’ koikina ekta economic empowerment sheme introduce kuuribole laga aro unemployment (manu khan naukri napa) laga mamla ke sabole laga plan janaisey.
Tai para Mizoram laga culture, dhorom aro tradition ke bachabole nimitey Congress party laga commitment wapas yaad dilaisey.
Mizoram ke visit kora homoitey, Rahul Gandhi para Aizawl te, Congress party laga leader khan logotey baat-chit kurisey aro din fale Delhi jabole naola agey te Lunglei jag ate ekta public meeting te kotha kurisey.
Add Comment