July 21, 2021. Mizoram te 24 ghonda pithor te 725 Covid-19 cases positive tested korishe, etu melaikena itya State te 29,020 cases ase koikena Wednesday din health department official para janaishe. 725 cases pithor te 111 cases toh Aizawl Municipal Corporation (AMC) laga 6 jaga te testing drive thaka samai thurishe, koikena official para janaishe. Zoram Medical College (ZMC) laborartory te RT-PCR tests kora samai 44 cases paishe aro 647 cases toh Rapid Antigen Test para thurishe aro baki 34 cases toh TrueNat tests para thura ase koishe. Etu pithor te 138 bacha logot be notun cases te samil ase. Tuesday din positivity rate toh 10.85% para 16 % te othishe koishe. Aizawl district te sobse besi 461 cases thurishe aro etu beche Kolasib (116), Lunglei (72), Mamit (33), Lawngtlai (25), Siaha (16) aro Serchhip (2) cases paishe. Officials laga khobor hesab te 342 manuh ke contact tracing samai bemar toh thura ase aro baki 383 manuh logot bemar thura toh itya khobor kori ase koishe. 725 bemar manuh pithor te 651 manuh toh Covid- 19 symptoms ase koishe. Mizoram te itya 6,833 active Covid19 cases ase aro etu samai 22,061 bemar bhal hoikena ase, etu oper Tuesday din te 373 bemar bhal howa khobor ase, tai para janaishe. State te 5.69 lakh samples test loikena ase aro etu oper 24 gonda samai 4,530 lowa khobor ase. Covid-19 recovery rate toh 76% te ase aro manuh mora rate toh 0.43% te ase koishe. State immunisation officer Dr. Lalzawmi laga khobor hesab te Tuesday din dak te 6.11 lakh oper manuh logot vaccine thikena ase koishe.
Mizoram te 725 notun Covid19 positive cases khobor
