Naga kotha pora Manipur manu kan alak kotha ula huijabo

NEW DELHI, NOVEMBER 3 : Friday din Senior Army Officer, Defence Experts, purana Bureaucrats aro Police Officers kan Security nemite Seminar mana ke chama kurikena thakise. Etu time te Army Chief General Bipin Rawat pora Punjab aro Assam te bithormanu kan ulai kena besi hui thaka toh sob “External Linkages” (tusera jaka pora melekena aha) laga kam hi ase. Etu karne etu nahua chamala nemite chulti pora saidebole kura nai koile ulta bithormanu toh besi-besi huijabo. Aro ami kan etu ke saidebole deri huijaa hobo aro nabara huijabo koi kena janaise.

Tai bi Punjab te shant kurikena aram pora thaka laga ase. Huilebi etu External Linkages laga kam pora etu state te aro bithormanu aro atankwatti laga kam toh besi huijai ase. Etu karne ami kan etu nahua chamala nemite ekdam husir kurikena saidebole kuribo lagi. Aro etu Punjab state laga chamala toh khotum huise babuna nakuribi. Aro ami kan etu nahua chamala toh kedia harijabole ase najani. Etu karne etu nahua chamala nemite ene khotum huise koi kena sorkor baan kurijabole nakuribi. Ulta ami kan etu chamala nemite chulti pora saidebole kuribo lagi. Nahuile besi deri huijabo koi kena janaise.

Tai bi ami kan desh te Internal Security chamala toh sobse dangor wala ase. Huilebi kotha toh kinika ami kan etu Internal Chamala saidebole nabari. Etu toh kele koile “External Linkages” thaka pora ase koi kena janaide thakise.

Etu din toh Centre for Land and Warfare Studies (CLAWS) Defence Think-Tank pora ulabole kurikena mana laga ase. Etu din te tai bi Naga Bithormanu laga kotha aro Naga Peace nemite kotha manabole kura toh Manipur Bithormanu kebi melekena thaka laga chis ekta ase. Aro etu 2 jun States laga Bithormanu logot kebi kunoba Linkages (mela-mele kura) kan ase koi kena janaise. Etu karne chute Naga manu laga kotha manabole kura pora Manipur manu kan ke diktar kuridese koile Manipur state laga bithormanu kanbi alak babuna pora notun kotha ulaijaa hobo koi kena janaide thakise.

Etu oporte tai bi Assam state te bi etu External Linkages laga kam pora nahua kuride ase aro bithormanu besi huijaa hui ase koi kena janaise.