March 03, 2025, 06:04 PM: Itu 14th Nagaland Legislative Assembly laga 6th Session toh hoiley 3rd March, 2025 tey shuru hoishey, Nagaland laga Governor – La Ganesan para address kuri kena, Nagaland Legislative Assembly hall, Kohima tey.
Itu Governor para tai laga address tey, koishey ki, itu government toh hoiley, tai khan laga third saal tey gushiboley asey koi kena, juldi para aru itu asey ki, tai khan toh hoiley itu State laga manu khan ke commitment di kena rakha toh fulfil kuriboley.
Itu Governor para koishey, ki, House toh houley mili kena step loishey, itu Naga Political Issue laga shanti laga resolution ensure kuriboley karney. Itu House tey para assure kuri kena thaka hisap tey, itu Chief Minister para, itu Government toh hoiley ekta Consultative Meeting loishey, itu apex aru influential tribal body khan logotey aru civic society organization khan logotey, itu Naga Political Issue opor tey bhabana kuriboley.
Itu meeting toh hoiley 12th September 2024 tey loa laga thakishey. Tai para august house laga member khan ke thanks janaishey, tai khan laga pura cooperation diya nimitey, itu important matter tey.
Itu Governor para tai laga address tey, itu Government laga achievement khan bhi highlight kurishey, itu chuli thaka financial saal laga homoi tey, aru itu bhi mention kurishey ki, itu Government laga future programme khan bhi mention kurishey.
Agriculture & Allied Sector khan, Rural Development tey, itu Governor para state kurishey ki, itu agriculture sector toh hoiley itya bhi ekta pivotal role play kurey moi khan laga economy tey. 70 percent nishina population toh hoiley direct para nahoiley indirect para agricultural aru allied activity khan laga opor tey dependent asey.
Add Comment