Nagaland te Nigerian desh manu jail te thaka ulaidese

DIMAPUR, NOVEMBER 24 : Nigerian desh laga moda ekjun Nagaland state laga Dimapur Jail te September 7, 2016 porahi thalide kena rakha toh Friday din te ulaidese. Etubi tai jail te eman dukh kurikena thaka bejete. Etu Nigerian desh moda laga naam toh Nweze Raymond Chinenyeuba ase. Aro tai ke New Field Police Check Gate, Dimapur laga pora thura laga ase. Etubi September 7, 2016 te Guwahati, Assam laga rati Bus kari pora aha time te. Aro tai ke thura toh Visa nathaka pora thura laga ase koise.September 20 te Apex Court pora Home aro External Affairs Ministries ke etu Nigerian desh moda ke jail pora ulaidebole kotha janaise. Etubi 4 habta majutte. Aro tai ke neju jaka te bataidebi koi kena janaise. Asulte etu Nigerian moda ke Dimapur Chief Magistrate pora 8 moina aro 17 din nemite hi jail te saja babole hisabte naam te anede kena thaka laga ase. Etubi Foreigners Act, 1946 laga hisabte. Eneka huikena tai ke Dimapur Sub-Jail te thala toh May 25, 2017 last thakise koise. Huilebi tai ke ene rakhi thakise. Kele Nagaland Home Department kan toh India desh laga Centre pora etu Nigerian desh moda ulaidebole karne asul khobor toh nabaa karne. Eneka huikena November 12, 2018 te hi Nagaland Home Department laga haat te etu Union Ministry of Home Affairs (MHA) pora etu Nigerian moda ulaide kena neju desh te bataidebole khobor baise koise. Etu karne tai logot Friday din te ulaidese koise.